وبعدين معاك ياشعب ياناكر للجميل

وبعدين معاك يا شعب ناكر للجميل
الراجل مقطع نفسه طول النهار والليل
بيدفع لك من جيبه للدعم والتمويل
وانت مفيش فيك اى فايدة ولسه ذليل
مش فالح غير بس ف الزمر والتطبيل
ومش عارف تشكر وتحمد وكل يوم تهليل
ثلاثين بالمية زيادة ورئيس وزارة طويل
نعمل لك ايه تانى دا انت راجل سقيل
احمد ربك وحكومتك بطل بأه التهويل
مش لازم تاكل لحمة وفراخ وزيت نخيل
حتى الصيام دا نعمة رمضان اكبر دليل
خللى ايامك رمضان وبلاش سحور بالليل
لكن يوم عيد ميلاده هانقدم له الدليل
هنقدم له الدليل هانقدم له الدليل

موعدنا اربعة مايو باذن الله

اه يا حكومتى السنية
يا ام الطلعة البهية
تعرفى انا نفسى ف ايه
نفسى فى حلة ملوخية

لكن انا بضرب لخمة
ف طابور العيش الزحمة
او لما مراتى تقول لى
ولادى نفسها ف اللحمة

اللحمة بكام يا حكومة
وانا كل جيوبى مخرومة
انا كل املى عزومة
دا ولادى بقت مظلومة

عايزين تلغوا الاضراب
مش لازم كيلو كباب
ممكن رغيفين مع جبنة
انا اصلى عيشتى هباب

سيبك م اللى بيتظاهروا
دول من تانى هايتطاهروا
لكن انا هسكت خالص
بالالف جنيه لو ظهروا

عارف انها تخاريف
وبكرة بتاعى مخيف
دى حكومة بدون تصريف
ويكفى سرور ويانظيف

الرابع من مايو عيد
عيد ميلاد عبد المجيد
اصل التلاتين فى المية
مش ممكن يوم هاتفيد

وتفيد ازاى يا جماعة
اصل الاسعار شماعة
لو زادت تخرب بيتى
وبتعلى ساعة بساعة

اسف .. انا موش بحب السياسة لكن الجوع قرصنى وغصب عنى هاشترك ف الاضراب يمكن يفرجها ربنا عليا واعرف اجيب كيلو فول وعدس وزيت لام العيال
ومش لازم لحمة .. دا محال
اللحمة نعيشها ف الخيال